कठोर परिश्रम, जिद्द आणि चिकाटीच्या जोरावर युपीएससीत यश मिळवणे शक्य युपीएससी रँकर डॉ. अक्षय मुंडे यांचे मत

लातूर - युपीएससी परीक्षेत यश मिळवून देश सेवा करण्याचे स्वप्न अनेकांनी उराशी बाळगलेले आहे. हे स्वप्न साकार करण्यासाठी अथक परिश्रम, चिकाटी आणि जिद्द अंगी बाळगणे आवश्यक असल्याचे मत नुकतेच युपीएससी परीक्षेत यश मिळवलेले व एमआयडीएसआर दंत महाविद्यालयाचे माजी विद्यार्थी डॉ. अक्षय मुंडे यांनी व्यक्त केले.

लातूर येथील एमआयडीएसआर दंत महाविद्यालयातील माजी विद्यार्थी समिती व शैक्षणिक समिती यांच्या वतीने आयोजित 'नागरी सेवांमधील संधी' या विषयावर आयोजित व्याख्यानात डॉ. अक्षय मुंडे बोलत होते. यावेळी व्यासपीठावर कार्यकारी संचालक डॉ. हनुमंत कराड, प्राचार्य डॉ. सुरेश कांगणे, उप प्राचार्य डॉ. यतीश कुमार जोशी हे उपस्थित होते. या प्रसंगी युपीएससी परीक्षेतील यशाबद्दल डॉ. अक्षय मुंडे यांचा डॉ. हनुमंत कराड व माजी विद्यार्थी समिती, शैक्षणिक समिती पदाधिकारी यांच्या हस्ते सत्कार करण्यात आला.

युपीएससी म्हणजे आयुष्य नव्हे तो फक्त आयुष्याचा एक भाग आहे. युपीएससी व इतर स्पर्धा परीक्षांना सामोरे जाताना अभ्यासासाठी दिलेला वेळ हा तुम्हाला यशापर्यंत घेऊन गेला नाही तरी तुमचे व्यक्तिमत्व घडवतो, असे सांगून यावेळी पुढे बोलताना डॉ. अक्षय मुंडे म्हणाले की, मी परळी तालुक्यातील पांगरी या खेडेगावातील शेतकरी कुटुंबातून आहे. माझ्या लहान वयातच वडिलांचे छत्र हरवले असून माझे शिक्षण व पालनाची पूर्ण जबाबदारी आईनेच पेलली आहे.

माझे प्राथमिक व माध्यमिक शिक्षण हे जिल्हा परिषद शाळेतून झालेले आहेत. पुढे अकरावीत विज्ञान शाखेत प्रवेश घेऊन बारावीत चांगला अभ्यास केला. त्यानंतर लातूर येथील एमआयडीएसआर दंत महाविद्यालयात बी.डी.एस. साठी नंबर लागला. या महाविद्यालयात अभ्यासाबरोबर स्वयंशिस्त, सेवाभाव, सामाजिक, सांस्कृतिक, क्रीडा आदी उपक्रमातील सहभागाने माझा सर्वांगीण विकास झाला. सन २०१८ मध्ये बी.डी.एस. पदवी उत्तीर्ण केल्यानंतर काही दिवस परळी व त्यानंतर पुणे येथे युपीएससी परीक्षेचा अभ्यास सुरू केला. वैद्यकीय शाखेचा विद्यार्थी असल्याने सातत्याने अभ्यासाची सवय येथे कामी आली आणि जास्तीत जास्त वेळ मला अभ्यासासाठी देता आला.

माझी घरची आर्थिक परिस्थिती अत्यंत हलाखीची असल्यामुळे सेल्फ स्टडी करून पहिली पूर्व परीक्षा दिली मात्र पहिल्या प्रयत्नात अपयश आले. त्यानंतर पुणे येथे मुख्य परीक्षेच्या ऑप्शनल विषयासाठी वीस हजार रुपये फी असलेला एक क्लास लावता. त्यातील पाच हजार रुपये फी भरून क्लास सुरू झाला. काही दिवस हा क्लास केला मात्र फी चा पुढील टप्पा वेळेत न भरल्याने क्लासला येण्यास मनाई केली. त्यानंतर पुन्हा दृढ निश्चय करून सेल्फ स्टडी ला सुरुवात केली.

सन २०१८ पासून ते २०२५ पर्यंत कुटुंब व समाजापासून दूर राहून सातत्याने अभ्यास केला. यादरम्यान आलेल्या अपयशाने अनेक वेळा नैराश्यातही गेलो मात्र ध्येयाशी असलेली बांधिलकी कायम ठेवून आत्मविश्वास ढळू दिला नाही. युपीएससी पूर्व परीक्षा प्रश्न पत्रिकांचा अभ्यास, योग्य स्टडी मटेरियल, मुख्य परीक्षेच्या अनुषंगाने लेखन सराव, परीक्षा पद्धतीचे अवलोकन आणि मुलाखतीची तयारी अशा पद्धतीने अभ्यासाचे नियोजन केले. अभ्यासाबरोबर मानसिक, शारीरिक आरोग्याची काळजी घेतली.

मुख्य परीक्षा उत्तीर्ण झाल्यानंतर मुलाखतीसाठी विशेष तयारी केली. देहबोली, वर्तन, संवाद कौशल्य, हजर जबाबीपणा, विषयाचे सखोल ज्ञान अशा पद्धतीने तयारी करून मुलाखतीला सामोरे गेलो आणि माझे युपीएससीचे स्वप्न साकार झाले, असे डॉ. अक्षय मुंडे म्हणाले.

यावेळी बोलताना डॉ. हनुमंत कराड म्हणाले की, अक्षय मुंडे यांनी कोणतेही मार्गदर्शन नसताना युपीएससी सारख्या परीक्षेत स्वयं अध्ययन करून यश मिळवणे हे कौतुकास्पद असून स्पर्धा परीक्षेची तयारी करणाऱ्या तरुणांसाठी प्रेरणादायी आहे. स्पर्धा परीक्षेसाठी कक्षे बाहेरील विचार, समग्र आणि सकारात्मक दृष्टिकोन आवश्यक आहे.

या कार्यक्रमाचे सूत्रसंचालन डॉ. प्रणोती चिंचणसुरे यांनी केले तर आभार डॉ. पुनम नागरगोजे यांनी मानले.

या कार्यक्रमासाठी शैक्षणिक समिती अध्यक्ष डॉ. गौरी उगिले, माजी विद्यार्थी समिती प्रमुख डॉ. पुनम नागरगोजे, सदस्या डॉ. रोहिणी दिवेकर, डॉ. तृप्ती गिरी, डॉ. प्रणोती चिंचनसुरे यांच्यासह एमआयटी शिक्षण संकुलातील प्राध्यापक, डॉक्टर व विद्यार्थी मोठ्या संख्येने उपस्थित होते.