एमआयटीत दोन दिवशीय आंतरराष्ट्रीय इलेक्ट्रोकॉन २०२५ फिजिओथेरपी परिषदेचे आयोजन
एमआयटीत दोन दिवशीय आंतरराष्ट्रीय इलेक्ट्रोकॉन २०२५ फिजिओथेरपी परिषदेचे आयोजन
लातूर – महाराष्ट्र आरोग्य विज्ञान विद्यापीठ व महाराष्ट्र इन्स्टिट्यूट ऑफ फिजिओथेरपी महाविद्यालय, लातूर यांच्या वतीने दि. ११ व १२ ऑक्टोबर रोजी संत ज्ञानेश्वर डोम येथे आंतरराष्ट्रीय इलेक्ट्रोकॉन २०२५ परिषद होणार आहे. या परिषदेत भारत आणि परदेशातील प्रसिध्द फिजिओथेरपी तज्ञ, संशोधक, चिकित्सक आणि विद्यार्थी इलेक्ट्रोथेरपी आणि पुनर्वसन विज्ञानातील नवकल्पना आणि प्रगतीवर चर्चा करण्यासाठी एकत्रीत येणार आहेत.
इलेक्ट्रोकॉन २०२५ परिषदेचे उद्घाटन महाराष्ट्र आरोग्य विज्ञान विद्यापीठातील अलाईड हेल्थ्‍ सायन्सचे अधिष्ठाता डॉ. वाय. प्रविण कुमार यांच्या हस्ते होणार आहे. अध्यक्षस्थानी कार्यकारी संचालक डॉ. हनुमंत कराड, परिषदेचे अध्यक्ष प्राचार्य डॉ. सुभाष खत्री, सचिव डॉ. सिंगारावेल्लन यांची प्रमुख उपस्थिती राहणार आहे.
शनिवार पासून सुरू होणाऱ्या परिषदेत विविध सत्रांमध्ये प्रत्यक्ष कार्यशाळा, तज्ञ प्रात्यक्षिके आणि थायलंड आणि फिलीपिन्समधील तज्ञांसह अल्ट्रासाऊंड थेरपी आणि मॅन्युअल थेरपी सारख्या विविध विषयांवर फिजिओथेरपी व्यावसायिकांमध्ये क्लिनिकल आणि संशोधन क्षमता वाढविण्याच्या उद्देशाने परस्परसंवादी चर्चा होणार आहे. पुराव्यावर आधारित पध्दती, नवोपक्रम, आधुनिक पुनर्वसन तंत्रज्ञान आणि त्यापलीकडे समग्र उपचार दृष्टिकोन यातील दरी भरून काढणे हा या परिषदेचा उद्देश आहे.
या परिषदेसाठी महाराष्ट्र आरोग्य विज्ञान विद्यापीठ, महिडोल विद्यापीठ, थायलंड, सँटो टोमस विद्यापीठ, फिलीपिन्स येथील फिजिओथेरपी संस्था आणि आरोग्यसेवा संस्थांसह प्रख्यात विद्यापीठांचा सहभाग असणार आहे.
