महाराष्ट्र आरोग्य विज्ञान विद्यापीठाच्या शॉर्ट टर्म रिसर्च ग्रँट साठी एमआयपी फिजिओथेरपी महाविद्यालयातील डॉ. स्वरा खानापुरे यांची निवड
महाराष्ट्र आरोग्य विज्ञान विद्यापीठाच्या शॉर्ट टर्म रिसर्च ग्रँट साठी एमआयपी फिजिओथेरपी महाविद्यालयातील डॉ. स्वरा खानापुरे यांची निवड
लातूर येथील एमआयपी फिजिओथेरपी महाविद्यालयातील एम.पी.टी.एच. प्रथम वर्षातील विद्यार्थीनी डॉ. स्वरा संतोष खानापुरे यांची महाराष्ट् आरोग्य विज्ञान विद्यापीठ, नाशिक (MUHS) यांच्या शॉर्ट टर्म रिसर्च ग्रँट 2024-25 (STRG) या संशोधन कार्यासाठी नुकतीच निवड झाली आहे. राज्यातील शासकीय व निमशासकीय वैद्यकीय महाविद्यालयातील विद्यार्थ्यांतून सदरील संशोधनासाठी ही निवड झाली आहे.
गेल्या एप्रिल 2025 मध्ये महाराष्ट् आरोग्य विज्ञान विद्यापीठाच्या वतीने शॉर्ट टर्म रिसर्च ग्रँट 2024-25 (STRG) या संशोधन कार्यासाठी राज्यभरातील बी.पी.टी.एच. व एम.पी.टी.एच. फिजिओथेरपी अभ्यासक्रमाच्या विद्यार्थ्यांकडून प्रस्ताव मागवले होते. त्यामध्ये एमआयपी फिजिओथेरपी महाविद्यालयातील 25 विद्यार्थ्यांनी संशोधन कार्यासाठी प्रस्ताव पाठवले होते. यामध्ये 25 पैकी एम.पी.टी.एच. प्रथम वर्षातील विद्यार्थीनी डॉ. स्वरा खानापुरे या विद्यार्थीनीच्या प्रस्तावाची निवड करण्यात आली आहे. यामध्ये ‘फ्रोजन शोल्डर असलेल्या रुग्णांमध्ये वेदना, आरओएम आणि अपंगत्वावर स्पेन्सरच्या तंत्राचा मैटलँडच्या गतिशीलतेवर परिणाम: एक यादृच्छिक नियंत्रण चाचणी’ या विषयावर डॉ. स्वरा खानापुरे संशोधन करणार आहेत.
येत्या सप्टेंबर 2026 पर्यंत सदरील संशोधन पुर्ण करुन ते महाराष्ट् आरोग्य विज्ञान विद्यापीठाकडे सादर करावयाचे आहे. या संशोधन कार्यासाठी एमयुएचएसकडून पाच हजार एवढे विद्यावेतन मिळणार आहे. अशा संशोधन कार्यासाठी एमआयपी फिजिओथेरपी महाविद्यालयातून डॉ. स्वरा खानापुरे यांची पहिल्यांदा निवड झालेली आहे.
या निवडीबद्दल डॉ. स्वरा खानापुरे यांचे एमआयपी फिजिओथेरपी महाविद्यालयाचे कार्यकारी संचालक डॉ. हनुमंत कराड, प्राचार्य डॉ. सुभाष खत्री, मार्गदर्शक डॉ. गौरव भटनागर यांच्यासह शिक्षक, शिक्षकेत्तर कर्मचारी व विद्यार्थ्यांतून अभिनंदन होत आहे.
